الاثنين، 1 سبتمبر 2008

الرحيل


من لطف الله عز وجل بنا أن يرسل إلينا رسائل

من شأن هذه الرسائل
أن تجعلنا ننتبه
ومن شأنها أيضا أن تهز كياننا فتجعلنا نقف
نعيد ترتيب أوراقنا من جديد
إلى رحمة الله
الأخ
ياسر محمد يوسف صبيح
23 سنة

(بكالوريوس تجارة)
الأخ
نصر محمد يوسف صبيح
20 سنة

(الفرقة الثانية علوم الأزهر)
الأخ
عبدالرحمن عرفة صبيح
19 سنة
ليلة الخميس الماضى
لن تمحى من الذاكرة
ولابد أنها ليلة فاصلة فى حياة الكثيرين من شباب بلدتنا
كان الثلاثة الأخوين ياسر ونصر وإبن عمتهما عبدالرحمن
بيننا
معنا
نصافحهم نمازحهم
نلعب معهم كرة القدم
وبدون مقدمات
لم يعد فى حياتنا ياسر
ولم يعد نصر بيننا
ولم تعد رؤية عبدالرحمن فى الدنيا ممكنة
مات الثلاثة
(وجاءت سكرة الموت بالحق )
كانوا فى طريقهم لرحلة ترفيهية
رأينا برنامجها فى مفكرة نصر الخاصة
يشغل القرأن والقيام منها حيزا
كانت صلاة الجنازة بأكبر مساجد بلدتنا فى الساعة الثالثة فجرا
ولم يسع المسجد ربع أعداد المشيعين
بكاء من الجميع كبار وصغار
من يعرفهم ومن لايعرفهم
بكاء لم يقطعه إلا كلمات الدكتور محمود عزت ودعاء الكتور جمال عبدالهادى
كانت ليلة غريبة بكل المقايس
تألف عجيب بين الليل والحزن والدموع وألام الفراق
إلى رحمة الله وألحقنا الله بهم على خير

الأحد، 10 أغسطس 2008

إقالة الدكتور عاطف النقلى عميد كليتنا الموقر ..............هههه دامت لمين

دامت لمين يادكتور
فعلا لا تدوم لأحد
بالأمس كان يصرخ فى وجوهنا
أنا اهم حاجة عندى منصبى اللى يهدد منصبى أدوسه
وإنتو بتهددوا منصبى
هتعملى فيها زعيم ياض إنت وهو
الكلية دى بتاعتى أعمل فيها اللى أنا عايزه
إنتوا فاهمين
لما حرمنا من دخول الأمتحانات
كنا بنهتف من قلوبنا
يسقط الدكتور عاطف النقلى
وكانت دعوات أمهاتنا تلاحقه
ربنا ينتقم منه
وقد جاء اليوم وسقط الدكتور عاطف النقلى
وربنا سبحانه وتعالى إنتقم منه وأخد منه الشىء الذى من أجل الحفاظ عليه تجبر علينا
وفى سابقة لم تحدث فى تاريخ كلية الحقوق من قبل
أن يقال عميد بعد عامين فقط
أصبح الدكتور النقلى يحمل لقب
عميد سابق
اللهم لا شماتة
ولكن العظة والعبرة
فلا شىء يدوم إلا وجه الله

السبت، 26 يوليو 2008

من بوش لأوباما......... ياقلبى لاتحزن


أبدى الكثير من العرب والمسلمين تفائلا شديدا فى البداية إزاء تفوق مرشح الرئاسة الأمريكية عن الحزب الديموقراطى السيناتور باراك أوباما ذاك الرجل صاحب البشرة السمراء وذى الأصول الكينية
مصدر التفاؤل لم يكن فقط ان أوباما من أصول إفريقية ولكن أضف إلى ذلك تصريحاته التى ترفض تواجد القوات الأمريكية فى العراق وكذلك تلك التى قال فيها انه من الخطأ تعاون الولايات المتحدة مع ديكتاتورين فى الشرق الأوسط ودعمها لهؤلاء الحكام رعاية لمصالحها
وإعتماد بلاده على نفط يأتى من تلك البلد التى يحكمها هؤلاء الديكتاتورين
تفائل البعض وتنبأ بأن المرحلة القادمة فى حالة فوز أوباما بمقعد الرئاسة ستشهد تغيرا إيجابيافى طريقة تعامل الولايات المتحدة مع مع الأطراف العربية والإسلامية
لكن الرجل نفسه الذى إستبشر به العرب خيرا وتمنوا فوزه هو من يسعى الأن للتقرب من إسرائيل فيصرح عن عزمه وقف النشاط النووى الإيرانى المهدد لأمن إسرائيل بالرغم من تأكيده فى البداية على أهمية الحوار مع إيران كقوة فاعلة فى المنطقة
وهاهو يصرح عن رفضه تقسيم مدينة القدس ويؤكد على ضرورة وجودها كاملة كعاصمة لأسرائيل
وإذا كان السيناتور أوباما يرفض تقسيم مدينة القدس فنحن أيضا نرفض التقسيم ونريدها عاصمة لفلسطين كما كانت وكما ستكون
ما أود قوله أننى أكره أن نعلق أمالنا فى تغير أوضاعنا وتحسينها على غيرنا فنحن فقط من يستطيع أن يحسن أوضاعنا أيا كان هذا الغير
فلاخلاف بين أوباما الأسود وبوش الأبيض
فبوش كأوباما وأوباما كبوش،وأمريكا هى أمريكا بظلمها وجبروتها وطغيانها وإستعلائها
وأيا كان رئيسها فلن تنظر إلينا إلا بتلك النظرة الإستعلائية المتكبرة
وسيرحل بوش ويأتى أوباما أوغيره وستظل أمريكا التى أسست بنيانها على الظلم فاستحلت دم الهنود الحمر وأستعبدت الأفارقة
ستظل تبطش بكل مايتعارض مع مصالحها تقتل ،تنهب ،تزور،تتعاون مع الديكتاتورين غاصبى السلطة من حكام الشعوب العربية والإسلامية فهى لن تجد خيرا من هؤلاء عونا لها فى تحقيق مصالحها.
وليذهب بوش ويأتى أوباما فمن بوش لأوباما ياقلبى لاتحزن

الخميس، 3 يوليو 2008

جيل إستثنائى



حكايتى هى بالضبط حكاية وقصة جيل بأكمله
جيل حياته كلها إستثنائية فى ظل قانون إستثنائى
جيل نشأ وإتربى على الذل والخنوع
جيل لا يعرف عن الحرية إلا إسمها
جيل إتربى على إمشى جنب الحيط ولوعرفت تمشى جوا الحيط يبقى أسلم وأحسن
جيل إترسخ جواه إن مفيش فايدة وهى خربانة يابنى خربانة
واللى غرقوها يفوقوها
السياسة نجاسة واوعى تتكلم لتروح ورا الشمس
جيل ضيع أحلى سنوات عمره فى تعليم لا يسمن ولا يغنى من جوع
تعليم يقتل المواهب فضلا عن إخراجه لإ نسان ممسوخ مغيب عن الواقع مسفه الأحلام
أقصى أحلام أبناء جيلى هو السفر والهروب من جحيم مصر إلى أى مكان أخر سواء كان هذا المكان غنى أم فقير
المهم الهروب من المشاكل ومن واقع بلدنا المتخلفة
إحنا جيل أجبر على كره بلده
جيل بتحاصره المشاكل من كل إتجاه (بطالة-فقر-مرض -ظلم وإستبداد ............إلخ)
شوفنا بعنينا إن أقل قيمة فى بلدنا هى كرامة البنى أدم
جيل خرج وفتح عنيه لقى ناس فوق خالص وناس تحت الأرض
طلعنا للدنيا لقينا مبارك هو الريس والزعيم والقائد وبالرغم من إنه بيمص فى دم مصر والمصرين إلا إنه بينجح فى كل الإستفتاءات والإنتخابات بنسبة 99فى المائة
أصل إحنا يابنى إتعودنا عليه وجربناه وبعدين ده شبع من كتر ماسرق يعنى نجيب واحد يسرق من جديد
طلعنا لقينا الحزب الوطنى حزب الأغلبية وهو فقط ولا أحد غيره متواجد والإخوان الوحشين الإرهابين بيدخلوا السجن وبيسقطوا فى الإنتخابات وبيتحاكموا قدام محاكم عسكرية وطلابهم بيتفصلوا فى الجامعة وبيتحرموا من دخول الإمتحانات.
عندما وعينا ماحولنا وجدنا إسرائيل تحتل فلسطين وفى نفس الوقت الذى يضرب ويقتل فيه الفلسطينين الرؤساء العرب يجلسون يبتسمون لرؤساء اليهود والأمريكان وأل إيه بيدفعوا عجلة السلام
ربنا يعنهم بيتعبوا والله
كبرنا ودخلت الجامعة وحلمت زى غيرى بالنشاط الطلابى وإتحاد الطلبة والإنتخابات والأسر والجوالة والقصص الحلوة اللى كنا بنسمعها عن الجامعة والحركة الطلابية
دخلت وأنا بحلم أترشح فى إتحاد الطلبة لقيت وأنا فى سنة رابعة كنت بحلم بس تنزل قائمة بأسماء من تقدموا للترشيح وإسمى مايكونش موجود فيها بس أشوف القايمة الإبتدائية دى شكلها عامل إزاى مش أشوف إنتخابات أشوف بس ورقة الإعلان عن الإنتخابات
دخلت الجامعة وأنا راسم صورة كبيرة لأستاذ الجامعة إتغيرت بعد أول إسبوع
لما أنا كطالب ألاقى أستاذ ورئيس قسم فى كلية القانون بيقولى إنت يابنى مفتكر إن حد يقدر يغيرالوضع السىء اللى إنت بتتكلم عنه لا إنت تقدر ولا أنا أقدر إحنا بتيجى لنا أوامر لازم ننفذها
لما أشوف أمين شرطة ملوش لازمة بيوجه عميد الكلية ويطلع له المكتب يقوله أوامر تحوز قوة الأمر المقضى زى ماعلمونا أساتذة المرافعات
جيل لقى الحشيش متوفر زى البنبونى فى الأول كنت مفتكر إن الموضوع ده فى بلبيس بس لكن بعد كده إكتشفت إن الموضوع معمم
أعتقد بعد اللى بيحصل لينا ده كله لازم نبقى تايهين ومش عارفين منين بيودى على فين
وطبيعى جدا إن يبقى قدوتنا إنريكى إجلاسيس وريكى مارتن وبيكهام وعمرو دياب
طبيعى جدا إنك متلاقيش حد عارف مين يحى عياش وعز الدين القسام
طبيعى جدا إن يطلع مننا ناس تمشى فى مظاهرات عشان تامر حسنى فى الوقت اللى بيتحاكم فيه العلماء وأساتذة الجامعة ظلما وزورا ومفيش حد يتحرك
طبيعى جدا لما كنا بنقول لزمايلنا فى الجامعة عايزينك تشارك معانا فى نهضة بلدنا أو تمشى معانا فى مظاهرة عشان قانون الطوارىء أو فلسطين يبصلك بإستغراب وكأنك جاى من كوكب تانى
إحنا جيل إتنزعت منه الرجولة والنخوة رغما عنه وأجبرنا على كره بلدنا وتاريخنا
نزعوا منا رجولتنا ونخوتنا وسلبوا عقلنا
من خلال إعلامهم وتعليمهم وظلمهم
بالظبط زى سمبا فى فيلم الكارتون الأسد الملك لما إتربى وسط النعاج بالرغم من أسد فأخذ عنهم طباعهم ولما كبر ورجع عشان يسترد مملكته كان عليه أن يواجه المفسدين من الأسود أبناء جلدته
لكن
هو أسد فى شكله فقط
لايستطيع أن يزأر، أظافره مثل أظافر الأسود لكنه لا يستطيع إستخدامها فى الخدش والإنقضاض
فهو قد تربى على النعومة ولم يحيا حياة الأسود من قبل
ولما بدأ تيمون وبومبا يثيروا الأسد بداخله بدأ وبالتدريج يسترد الأسد سمبا وأستطاع أن يسترد مملكة والده
إحنا كمان محتاجين حد يثير معانى الإنسان اللى إتقتلت وإندفنت بداخلنا
محتاجين من يثير معانى الرجولة بداخلنا بدل من لعن هذا الجيل ولعن ضعفه
والترحم على الأجيال السابقة
أخيرا وعشان انا عارف إن فى ناس كتير مبتحبش نظرية المؤامرة ومبتحبش تفسر الأمور من خلالها لكن هو الواقع
وإن كان دا الواقع
إحنا كمان إستسلمنا لواقعنا السىء ومحاولناش نغير أوضاعنا
كنا ادوات إستقبال جيدة لكل ماهو سىء

الأحد، 15 يونيو 2008

وَمِنَ النَّاسِ مَن يَعْبُدُ اللَّهَ عَلَى حَرْفٍ فَإِنْ أَصَابَهُ خَيْرٌ اطْمَأَنَّ بِهِ وَإِنْ أَصَابَتْهُ فِتْنَةٌ انقَلَبَ عَلَى
وَجْهِهِ خَسِرَ الدُّنْيَا وَالْآخِرَةَ ذَلِكَ هُوَ الْخُسْرَانُ الْمُبِين

الثلاثاء، 20 مايو 2008

اللهم عليك بمن ظلمنا


الظلم له طعم مر علقم يعرفه كويس قوى الإخوان لأنهم أكتر ناس بيتتظلم فى البلد دى
مش بس بيتظلموا من النظام المتحكم فينا
لأ بيتظلموا من الناس اللى سايبنهم لوحدهم يتطحنوا ويتسرقوا ويتحبسوا ويتفصلوا وكأن البلد ملك الإخوان لوحدهم
الشعب اللى يعنى المحترم فيه قوى قوى ممكن لوشافك وإنت معتصم أو ماشى فى مظاهرة عشان الطوارىء أو التعديلات الدستورية يقولك ربنا يعينكم
ودى قمة الإيجابية
فى الوقت اللى كل زمايلنا قاعدين فى بيوتهم بيستعدوا للإمتحان كل واحد على طريقته
طلاب الإخوان فى كلية الحقوق كل يومين مجموعة منهم بيكون عندهم مجلس تأديب
والسر الخطير ورا الهجمة الشرسة على الطلبة الوحشين المخربين بتوع الإخوان فى حقوق
اللى يخلى عميد الكلية يحولهم لمجلس تأديب قبل الإمتحان بكام يوم إنهم كانوا بيقروا قرأن على المدرج

وكانوا بيقولوا كلمات على المدرج

حاشا لله كلمات دينية وكلمات عن فلسطين
وكمان لأنهم بيلعبوا كورة فى ساحة الكلية


وإنهم علقوا لوحات عن غزة وكمان عملنا حاجة خطيرة علقنا علم مصر جنب علم فلسطين
وكمان علقنا لوحات عنوانها إلى كل من يحب مصر وكانت اللوحات دى بتتكلم عن شرعية المحاكمات العسكرية للمدنين
وكمان واحد مننا إتعرض لشخص الرئيس بصفته وطبعا دى أخطر تهمة زى ماقال لنا وكيل الكلية لشئون الطلاب حد برضه يتعرض للسيد الرئيس بالنقد إنت إتجننتم ولا إيه
دا الريس يابنى
عميد كليتنا الموقر فى كلام على جنب قال إنتم بتهددوا منصبى واللى يقرب من منصبى أدوسه حتى لوكان مين
وطبعا الدكتور عارف كويس إزاى يحافظ على منصبه


حرمان تسعة من دخول بعض إمتحانات الفصل الدراسى
وواحد من دخول إمتحانات التيرم كاملة


الأحد، 18 مايو 2008

مجالس تأديب جديدة بكليتنا الموقرة

عندى يوم الثلاثاء القادم مجلس تأديب
أسألكم الدعاء
وحسبنا الله ونعم الوكيل فى الظالمين

الاثنين، 12 مايو 2008

لعنة الرئيس تطول طلاب الإخوان بكلية الحقوق














لعنة الرئيس غلبت لعنة الفراعنة
لعنة الرئيس تطول طلاب الإخوان المسلمين فى كلية الحقوق ففى يوم عيلاد الزعيم الرئيس اليوم الذى ولدت فيه مصر
وأثناء كتابتى للمقال السابق (فى ذكرى ميلاد ولى النعم)
كان أربعة من طلاب الإخوان بحقوق الزقازيق يعرضون على مجلس تأديب والذى أتت نتيجته حرمان عبدالله أبو العينين من دخول إمتحانات التيرم الثانى كاملة وحرمان الثلاثة الأخرين من دخول إمتحان مادة القانون المدنى
الأخ عبدالله خميس كانت عقوبته أكثر قسوة لأنه وعلى حد تعبير وكيل الكلية لشئون الطلاب الدكتور عيد القصاص
تعرض لشخص رئيس الجمهورية ومن يتعرض لشخص رئيس الجمهورية نفصله على طول مش بس تيرم
ومن اليوم التالى مباشرة بدأ بركان الغضب فى الإنفجار فى صباح يوم الإثنين 5-5
بيان صادر عن طلاب الإخوان بكلية الحقوق ووقفة إحتجاجية فى فرع الكلية بالزراعة
ثم الإعلان عن إعتصام مفتوح حتى مقابلة عميد الكلية والتوصل معه لإتفاق
وكذلك الإعلان عن حملة تجميع توقيعات وقمنا بجمع مايقرب من ألف توقيع فى ساعة واحدة
وبعد ثلاثة أيام إنفض الإعتصام بعد مقابلة عميد الكلية والذى أقسم أنه سيستقيل من منصبه إذا لم يتمكن الطلاب من أداء الإمتحان
أحلى حاجة فى الإعتصام إن أنا بدأت مذاكرة كنا بنذاكر قدام مكتب العميد
وكمان إنى أكدت معانى كتير جوايا
إتأكدت إن صوت الحق دايما عالى وإن حقنا مش هنسترده إلا بالقوة والضغط
وإننا كطلبة بنكون أقوى وإحنا عايشين الواقع وإحنا عايشين سننا
وإننا بنكون ضعاف جدا وإحنا لبسين ثوب الحكمة والعقلانية
أخيرا الرجالة بتوعنا هيتعرضوا الخميس الجاى على مجلس التأديب الإستئنافى
نسألكم الدعاء وصلاة الحاجة

الأحد، 4 مايو 2008

فى ذكرى ميلاد ولى النعم


كل سنة وإنت .......................ياريس ربنا يارب يخليك لينا يامروقنا ومظبطنا ومرقصنا
وإخترناه إخترناه إحنا الشعب وكلنا وراه
مصر مش حزينة ياريس والناس زى الفل
مفيش حد تعبان ولاحد متضايق ولاحد مش لاقى ياكل ولا حد عنده فشل كلوى أو سرطان أو إلتهاب كبدى وبائى
ولا حد مرمى فى المعتقل من غير سبب ومفيش ياريس حد عاطل ومش لاقى شغل أو حد معاه كلية طب وشغال أمن أو عامل نظافة
ولا حد ياريس عايز يهرش ومش عارف عشان إيده مربوطة فى سرير المستشفى
ورغيف العيش متوفر وحجمه ةعائلى كمان
ياريس الناس فى دولتنا عارفين إن قيمتهم غالية عندك أوى وبتاخد لهم حقهم من كل اللى بيدوس ليهم على طرف
عشان كده ياريس الناس بيشكروك إنك ريحتهم من الشاطر وحسن مالك ومن معهم
الناس دى اللى منهم محتكرين للحديد ومنهم من تسبب فى غرق العبارات ومنهم من إستورد من إسرائيل مبيدات مسرطنة ومنهم من لوث دم المصريين
ياريس الناس بتشكرك على الحرية المطلقة اللى إحنا عايشين فيها وبيطلبوا من سيادتك ياريت تقلل نسبة الحريات عشان هما شعب إبن كلب مش على مستوى حكم سيادتك وغير ناضجين سياسيا
فالحرية الزيادة دى بيستغلها غلط
الشعب ياريس مشتاق لضربة قفا من ظابط من ظباط داخلية سعادتك
أما الطلبة ياريس فبيقبلوا إيد ك وبيقولوا ليك الحشيش ياريس متوفر زى البنبونى
الطلبة بيدعولك ياريس بجهنم قصدى بالجنة وبيقولو ليك إنهم بيتبرؤا من القلة المنحرفة اللى بتقول إن الجامعة مكان غير أهل لإستقبال البشر
وإن مفيش حرية فى الجامعة لأن الأمن بيتدخل فى كل حاجة
الطلبة ياريس بيشكروك كمان على المستوى الراقى الذى وصل إليه التعليم وعلى نزاهة الإنتخابات الطلابية وعلى فرص العمل اللى مستنياهم أول لما يخلصوا على طول
نفس الكلام بينطبق على العمال المرتب بيكفى الشهر وبيقدروا كمان يدخروا فلوس للزمن
وعدد ساعات العمل ست ساعات بس مفيش إتناشر ساعة والكلام الفاضى الموجود فى دول العالم الثالث ده
ياريس إحنا مش عارفين من غيرك كنا هنكون إزاى
هنعيش إزاى
بصراحة إحنا المفروض فى ذكرى ميلادك نبخر نفسنا عشان الشعوب التانية الحقودة متحسدناش عليك
ياريس وما ليك عليا يمين إحنا ملناش غيرك
إتولدت لقيتك رئيس وفى فى ناس من جيلى ماتوا وإنت رئيسنا اللى مروقنا
وشكلى هاموت وإنت رئيسنا
بصراحة أنا مش عارف إيه حكايتك معانا
ياريس الشعب مبيحبش الأغنية بتاعة الواد اللى بيقو فيه
إتخنقت
ياريس أنا مش بكرهك لأنك مسودتش حياتى
ياريس مش كفاية خليك لحد متخلص علينا وربنا ينتقم من الشيطان وإبن الشيطان وزوجة الشيطان وشلة الشيطان
عارف ياريس إنت عمال تطفش فى الإخوان وهما يقولولك مش هنسافر

أنا ياريس من الإخوان وأحب أقولك أنا هسافر وأسيبهالك لو عرفت أسافر
هو إنت خليت فيها حاجة يتقعد ليها
وإخترناه
إخترناه

الثلاثاء، 22 أبريل 2008

مين قتل فينا الإنسان


لما الكلام يموت على طرف لسانا ومنقدرش نخرجه

ونتكتم نخرس أحسن مايحصل لينا حاجة تانية

لما نشوف الظلم ولا كأننا شايفين حاجة ونشوف الغلط بيحصل قدام عينينا ولا كأننا شايفين حاجة

لما نؤثر عيشة الذل وأهى عيشة وخلاص على الموت فى سبيل حريتنا والحصول على حقوقنا

يبقى أكيد إحنا شعب إتقتل الإنسان جواه

وبقينا شكلنا بنى أدمين شكلنا وبس

إنما جوانا جماد مبيحسش ومبيتحركش ومبيفهمش

ونبقى نستحق كل اللى بيحصل لناأول لما وصلتنى رسالة بتقول إن المهندس خيرت وخمسة وعشرين عظيم إتحكم عليهم بأحكام من 3 إلى عشر سنين

بصيت للناس الماشين فى الشارع لا قيت كل واحد عادى خالص ولا كأن فى أى حاجة حصلت

كنت عايز أصرخ بصوت عالى وأقول يابشر إصحوا بقى

(لحد إمتى هنفضل ناخد على قفانا ونسكت)

لكن شوفت فى عيون الناس فى الشارع اللى خلانى أكتم حزنى جواياوأسكت متكلمش

شوفت فى عيون الناس إنكسار وذل ناتج من سنين القهر المتسطر تفاصيلها على وشوشهم

شوفت فى كل واحد من الشعب الصرى عامل زى جحا

هل ممكن يأتى اليوم اللى يثور فيه الشعب المصرى على الناهبين حقوقه؟!! الله أعلم

هل من الممكن بعد كل اللى بيحصل يكون فيه ناس بيحبوا البلد دى؟

اللى أنا أعرفه إن الإخوان لسه بيحبوا بلدهم وهيفضلوا يحبوا بلدهم

وعمر الشدائد والمحن والإبتلاءات ماوقفتهم

أخير أحب أقول إن إحنا بيحكمنا نظام غبى مبيتعلمش من التاريخ

جمال عبدالناصر كتب على ملف الحاج سعد لاشين مسجون للأبد ومجموعة أخرى من الإخوان

ومات عبدالناصر وشبع موت ومازال سعد لاشين يحيا خالدا

يربى ويعلم الأجيال وسيكرر التاريخ نفسه وكما مات جبروت الأمس عبدالناصر منتكسا سيموت جبروت اليوم بإذن الله موتة ذليلة

وسيحيا خيرت الشاطر فى قلوبنا عظيما مصلحا وستذكره الأجيال بالخير تدعو له

ومع كل حدث أزداد إعجابا بذلك الصرح العظيم الإخوان المسلمون

الخميس، 10 أبريل 2008

طلاب الإخوان

لما أتكلم عن طلاب الإخوان فأنا بتكلم عن جزء من عمرى شهد نقلة نوعية فى حياتى
بتكلم عن أهم أربع سنين عشتهم ،بتكلم عن أكتر إسم إرتبطت بيه لدرجة إنى مش متخيل إنى بعد شهر هانفصل تماما عنه
مش عايز أزايد فى الكلام الحلو عن طلاب الإخوان وفترة الجامعة لأن كل مرحلة ليها سلبيات وليها إيجابيات
يعنى فى فترة الجامعة عشت أيام أقدر وبكل ثقة أقول عنها أحلى أيام حياتى زى أيام الإتحاد الحر وأيام مؤتمر القاهرة الرابع -ويوم ماعملنا ندوة التعديلات الدستورية.........إلخ
وأيام تانية لا أعتقد إنى هقابل أسوأمنها
إتعرفت وإتعاملت مع شخصيات أسعدتنى معرفتهم والتعامل معاهم وطلعت بيهم كأهم حاجة خرجت بيها
وناس تانية ياريتنى ماعرفتهم ولا إتعاملت معاهم هحاول أنساهم وأمسحهم من ذاكرتى لأن ذكرهم بيسبب ليا أذى نفسى كفيل بأنه ينكدنى عشرين سنة ربنا يسامحهم ويهديهم
مع طلاب الإخوان إتعلمت وبشكل عملى معانى فوق الرائعة،إتعلمت إن مفيش شىء مستحيل وإن صاحب الحق دايما عينه قوية وصوته عالى ورايق ميعرفش السكوت ومبيخافش من الظالم ولابيهمه من قوته وجبروته
إتعلمت إن مفيش إنسان مش موهوب مفيش إنسان لايمتلك إمكانيات وقدرات تؤهل للنجاح وتوصيل رسالته لكل الناس
إتعلمت أتأقلم مع الواقع ومشكلاته وإزاى أكون جزء من الحل مش جزء من المشكلة
مع طلاب الإخوان إقدرت أكسر الحاجز بينى وبين نفسى وبين نفسى والمجتمع اللى أنا عايش فيه
مع طلاب الإخوان عرفت متعة جديدة متعة إنى إنى أتعب وأبذل جهد عشان رسالتى وفكرتى
مع طلاب الإخوان عرفت يعنى إيه أخالط الناس وأصبر على أذاهمويعنى إيه أتعب عشان غيرى يستريح دون إنتظار كلمة شكر من أحد
دخلت جامعة الزقازيق وأنا كاره كل حاجة فيها من أول مكانها مرورا بمبانيها إنتهاءا بطلابها لكن بسبب طلاب الإخوان فى كلية حقوق
بقيت بحس بعمار غريب بينى وبين الجامعة فى كل ركن من أركانها ليا موقف مقدرش يوم ماأنزلش الجامعة وأسلم على إخوانى الكرام
الحمد لله إنى دخلت حقوق الزقازيق على وجه التحديد عشان أقابل أحلى إخوان فى الدنياإخوة حقوق
مصطفى عزب
أول أخ قابلته فى الجامعة روح أى قاعدة أو سهرة الحياة عنده بسيطة جدا ومن ساعة ماخطب وهو محدش بيشوفه
أسامة مرسى
كبير بحق وحقيقى فى كل حاجة بيسد ومن أكتر الناس اللى أفتقدهم السنة دى
محمد فوز
أكرم من كده متلاقيش البيت بتاعهم شاهد علينا يوم القيامة ماعرفناش قيمته إلا لما خلص
خالد يحى
أحلى وأعذب صوت ممكن تسمعه وصاحب أطيب قلب عامل كده زى الناس بتاعة زمان
أحمد سعد
تلاقى عنده أسرار الإخوة كلهم لوساب الإخوان هايفضحنا
الخال عبدالرحمن النمر
لسه خارج من المعتقل راح المعتقل وهو عبدالرحمن ورجع تلاتة عبدالرحمن فى بعض
طارق الجبرى-----------خليفتى فى الكلية وأخ بيسلك فى الحديد
عرفة مرجان-------------- الحضن الدافى لكل إخوة الكلية
وكل إخوة حقوق اللى بشرف إنى واحد منهم أشرف قاسم والشيخ تامر حسن وخالد صيام وشميس ومعروف وطارق السمرى والسيد جمال
ومحمد رجب ومحمد يحى وشهوان وخالد عطية والحسينى وكل الرجالة
أخيرا الأربع سنين بتوع الجامعة عاملين زى واحد طلع رحلة زار أماكن عجبته وأماكن إتخنق منها
لكن غالب الرحلة كان ممتع وفى نهاية اليوم اللى عدى بسرع زى كل الأوقات الحلوة كان زعلان وفرحان
زعلان لأن اليوم خلص بسرعة وكان نفسه يستمتع أكتر وفرحان لأنه أصبح يمتلك مجموعة من الذكريات اللى من المستحيل إنه ينساها
إلى كل طلاب الإخوان بالفرق النهائية من أعرف ومن لا أعرف
لن أقول وداعا ولكن إلى لقاء عما قريب

الأربعاء، 19 مارس 2008

يابلد مافيهاش 000000000000000


فى مثل شعبى بيقول( يافرعون إيه فرعنك قال مش لاقى حد يلمنى

أنا مؤمن جدا بالمثل وبصحته يعنى كل البلاوى اللى بتحصل لينا من أول رغيف العيش اللى مش لاقبنه والبيضة أم 75 قرش وكيلو العدس أبو 9 جنيه مرورا بالسرطانات والفشل الكلوى والكبدى الوبائى وإنتهاءا إلى البطالة والتضخم وشوية الأصفار اللى حصلنا عليها واللى محصلناش عليها فى كل المجالات من تعليم ورياضة وتزوير الإنتخابات

إحنا كشعب السبب فى كل ده

إحنا السبب لما بعدنا عن ربنا سبحانه وتعالى وغيبنا اوامره وتعاليمه عن حياتنا

إحنا السبب لما شوفنا الغلط وسكتنا عليه ومشينا جنب الحيط وربينا ولادنا على كده لما شربنا مياه مجارى وأكل مسرطن وإنكتمنا

وقلنا إحنا شعب بياكل الزلط الحمد لله أقل من كده يكفى

إحنا السبب لما ناس مننا بيكون الاداة اللى بيستخدمها فرعون لظلم أى واحد بتسول ليه نفسه إنه يقول لأ

شاركنا فى ظلم نفسنا بدعوى إن دى أوامر لازم تتنفذ والله إنتوا ناس كويسين وإحنا عارفين بس منقدرش

إحنا السبب لما عميد كلية يستدعى طالب زى حالاتى وفى حضور ظابط الأمن يهدده ويقوله لو الكابتن فلان قالى إنك شاركت فى أى نشاط صح ولا غلط أنا هافصلك فصل نهائى

إحنا السبب لما ناس من المفترض إنهم محترمين يتسابقوا لنيل رضا الحزب الواطى عشان يكون ليهم نصيب فى الكعكة

إحنا شعب بجد الرجالة فيه بقوا قليلين جدا جدا جدا

الظلم بينا بقى حاجة عادية وطبيعية والحق تايه

وسلامات للنخوة والرجولة والكرامة والدم الحامى والحضرى رجع بالسلامة

والأهلى عمهم وحابس دمهم

ولو لم أكن مصريا لوددت أن أكون أى حاجة تانية ليها قيمة

ومصر هى مامتى لونها لون تيشرتى

وبالروح والدم نفديك ياريس إنت ومراتك وإبنك

هو إحنا هنغير الكون مفيش فايدة هى خربانة خربانة

والفلسطينين هما اللى باعوا أرضهم يستحقوا كل اللى يحصل ليهم

الاثنين، 10 مارس 2008

وهم القانون الدولى


عندما إلتحقت بكلية الحقوق أحببت كثيرا مادة القانون الدولى وأحببت أكثر الفكرة القائم عليها هذ القانون_فكرة تنظيم التعايش مابين أشخاص القانون الدولى (الدول والمنظمات الدولية)وكنت أظن العالم بمبادىء وقواعد هذا القانون سيصبح مثاليا خاليا من المشاكل ومن أكل ونهب الدول الكبيرة للدول الصغيرة والنامية
ظننت أن مبادىء هذا القانون بها حل مشاكلنا نحن العرب والمسلمين
فطبقا لقواعده ستجرم إسرائيل وتحارب من قبل المجتمع الدولى وكذلك سيكون من خلاله إنهاء إحتلال العراق وغيرها
لكن ظنونى قد بائت بالخيبة فما القانون الدولى إلا سلاحا تستخدمه أمريك والكيان الصهيونى فى وجه الإسلام والعرب والدول الصغيرة تطبقه إذا أتى لصالحها
ماسمعنا لهذا القانون صوتا فالصوت الأعلى والأوحد هو صوت البلطجة الأمريكية والصهيوني
فتجرم حماس حركة المقاومة ,المقاومة التى هى حق أصيل للشعوب وفقا لقواد القانون الدولى
بل والأكثر من ذلك يساعد المجتمع الدولى فى إحكام الحصار على الشعب الفلسطينى عقابا له على إختياره لحماس
بينما الكيان الغاصب الجبان الذى يرتكب المجازر فيقتل الطفال قبل الصغار ويدنس أماكن العبادة وقتلع الأشجار ويهدم البيوت لا أحد يستطيع أن يجرمه
فحماس عندما تدافع عن أرضها واهلها فهى حكة إرهابية وإسرائيل المعتدية يقدم لهاكل الدعم والتأيد
هذه هى موازين القانون الدولى المقلوبة

فلماذا حكامنا مازالوا يتمسكون بمعاهدات نقضها الطرف الأخر منذ عهود

لا أرى سببا إلا الخوف والرجفة من غضب أسيادهم والرغبة فى الحفاظ على كراسيهم

ولو على حساب شعوبه وأوطانهم

------------------------------

سيأتى اليوم الذى نقود فيه العالم وتكون تعاليم ديننا هى المصدر الرئيسى لقواعد القانون الدولى وسنجعل العالم ينعم بالأمن والسلام فى ظل حكمنا وقيادتنا

ولا تحسبن الله مخلف وعده رسله

فالنصر قادموالعزة لنا

وغزة هى عين الفجر

الثلاثاء، 19 فبراير 2008

كلام كده

طلاب الإخوان المسامين بالسنوات النهائية بياخدوا فى الأيام دى إستمارة 6
وبيتقال ليهم ياريت ياإخونا تورونا عرض إكتافكم أخر حاجة ليكوا عندنا
تقعدوا تجهزوا حفل الختام
هو ده حال الدنيا مش دايمة لحد
وداعا إيام الجامعة
وداعا إخوانى العظماء
-------------------

الأربعاء، 13 فبراير 2008

لسه فاكر إن عندى مدونة

مدونتى الغالية
أنا منستكيش
لسه فاكرك
والله
لسه فاكر إسمك
راجعلك تانى
قريب
جدا
جدا