الخميس، 13 ديسمبر 2007

يادكتور عيب عليك


إمبارح كان حفل تنصيب إتحاد الجامعة بقاعة الإحتفلات بكفاية إنتاجية

المهم معالى الدكتور نائب رئيس الجامعة أحمد الرفاعى بهجت ألقى كلمة بالنيابة عن رئيس الجامعة قال فيها موجها كلامه لأعضاء الإتحاد والكلام لسيادته وموجه لأعضاء الإتحاد
أنتم جئتم إلى هنا بإرادة زملائكم
مائة وخمسة ألف طالب إختاروكم لتمثلوهم
ومش عارف بصراحة الدكتور كان بيتكلم عن جامعة الزقازيق ولا عن الجامعة الأمريكية
ولا يمكن أنا يعنى مكنتش واخد بالى
كل شىء جائز
إنتخابات مرة واحدة وكمان شارك فيها 105 ألف طالب من 107 ألف طالب

صباح الإيجابية والديمقراطية والمولوخية

الحفل كان فيه حاجات كتير تانية من نفس النوعية بتاعة كلام الدكتور
مش عايز أفتكره أحسن لى وأحسن لكم

السبت، 8 ديسمبر 2007

إنا لله وإنا إليه راجعون




صعقت عندما قرأت على موقع شرقاوى أون لاين خبر يفيد بوفات أربع طالبات وعاملة وإصابة أكثر من مائة إثر سقوط جزء من جزء من مدرج بفرع جامعة الأزهر بالزقازيق _كلية الدراسات الإسلامية بنات
صغقت حزنت لكنى لم أستغرب أبدا حدوث مثل هذا الأمر ،فإدارة الجامعة لايشغلها مثل هذه الأمور التافهة مثل تطوير المبانى وإيجاد حلول للمشكلات المتفاقمة التى تعانيها الجامعة فى كل مرافقها
إدارة الجامعة لايشغلها إلا تنفيذ أوامر وتعليمات الأمن حتى إن أحد أساتذة القانون القانون المدنى قال لى (يابنى إحنا بيجى لينا تعليمات من الأمن لازم ننفذها )

إدارة الجامعة لايشغلها إلا العيال الوحشين المخربين طلاب الإخوان المسلمين حتى إن عميد كلية أصول الدين فرع الزقازيق جمع كل الدكاترة والموظفين والعمال ونزل بنفسه يضرب طلاب الإخوان ويقطع لوحاتهم
إذا سئلت عن وصف لجامعتنا فلن أجد وصف يناسبها إلا أنها مقلب زبالة محترم
تخيلوا جامعة فيها مجارى طافحة



تخيلوا جامعة محترمة الميكرفون بيصفر فيقوم الدكتور ضربه عشان يتعدل
بالذمة دا مكان ينفع يبقى مكان علم


شاطر بس عميد الكلية كل شوية يقول لينا ده مكان علم وبس
عفوا يادكتور


المكان ده ممكن يبقى أى حاجة غير إنه يكون مكان علم
يعنى مثلا وعلى الرغم من قذارة المكان ينفع يبقى مكان لعمل دماغ وتظبيط مزة محترمة
اه والله عندنا فى الكلية شرب البانجو فى مدرجات الكلية أمر طبيعى جدا
العيال بتضرب حشيش وبتتسلطن فى المرجات
يادكتور العلم فى الراس مش فى الكراس
لو حدث ماحدث اليوم فى بلد بيحكمه ناس محترمين بيفهموا
وعندهم دم وإحساس لاستقالت حكومة بأكملها
لكن إنت بتكلم مين دول عالم جبلات مبيحسوش
-------------------------------------------------------
قريت على مدونة عتريس دعوة للتبرع بالدم والتكافل مع الضحايا وذويهم
بجد ياريت نفعل الموضوع ده

الثلاثاء، 4 ديسمبر 2007

إعتقال


الأيام اللى قبل الإمتحان دى بتكون أصعب أيام فى حياتى

مش عشان خايف من الإمتحان وقلقان ومتوتر والحاجات دى لا سمح الله

أنا مش هانكر إنى فعلا السنة دى بالذات قلقان منها

لكن مش دى المعضلة

صعوبة الأيام دى إنى بيكون مطلوب منى أقعد فى البيت طول النهار

ومش فى أى مكان فى البيت غير على المكتب

وكأنى متحدد إقامتى

وبالتالى بتفصل عن كل حاجة بتحصل حواليك

ياسلام لوكانت الكلية من غير إمتحانات

كانت تبقى حاجة جميلة أوى

ربنا يوفق كل إخوانا أحسن نزلت النهاردة الكلية لقتهم قلقانين قوى

واللى ماسك كتاب بيقرا فيه

واللى ماسك شيت بيحله

واللى لسه خارج من محاضرة وبيشرحها لأخ تانى

ربنا يعدى الأيام دى على خير ويفك أسرى

قولوا أمين

أحسن شكل الكتب يرعب بصراحة

أقل كتاب 500صفحة فى عشر كتاب

لسه مفتحتش منهم ولا كتاب بالصلاة عالنبى


الأحد، 25 نوفمبر 2007

ياريتنى كنت لسه صغير


زمان لما كنت صغير وكان يبقى عندى واجب كتير
أو لما أكون زهقان من المرسة علشان بتخلينى أصحى بدرى
كنت بقول إمتى بقى أكبر وأدخل الجامعة وأخلص علشان أستريح من الواجب ومن المدرسة ومن الصحيان بدرى كل يوم
ومرت الأيام ولقيت نفسى مرة واحدة عندى عشرين سنة
وخلاص فى أخر سنة ليا فى الجامعة
وخلاص معدش عندى واجب كتير يقرفنى
لكن بقت فى حاجات كتير تانية بتضايقنى وتقرفنى
ياريتنى كنت لسه صغير
باخد واجب كتير
بصحى كل يوم بدرى
أفطر وأشرب اللبن
وأحضر الجدول بتاع النهاردة
وأقف فى طابور الصباح
وأروح أصلى الجمعة مع والدى
وأحضر حلقة الأشبال
مع الأستاذ عبدالرحمن
وأروح اليوم الرياضى
وألعب بالكورة البلاستيك

هما ليه زعلانين


كل يوم وأنا ماشى الصبح على الكلية

بشوف الأطفال الصغيرين وهما رايحين المدرسة الإبتدائية

مش عارف ليه بحس إنهم كبار مش صغيرين

بحس من شكلهم ونظراتهم إن عندهم يجى ستين سنة

بحس إنهم شايلين هموم بدرى

بحس إنهم متضايقين من حاجات كتير

وعندهم كلام كتير

السبت، 24 نوفمبر 2007

أستاذى الغالى معاذ فرماوى

أستاذى الغالى



وحبيب قلبى



الأستاذ معاذ فرماوى



أحد أبرز القيادات الإخوانية ببلبيس بالرغم من صغر سنه



وكان من أبرز القيادات الطلابية



لم أقابل أحد عرفك ولم يحبك



حتى ولو لم تقم بينك وبينه علاقة



لم أعرف أهميتك بالنسبة لى إلا بعد أن غيبك الظالمون



يعلم الله تبارك وتعالى وحده أنى لم أنساك طوال الأشهر الماضية



وأنه لم تغب صورتك عن قلبى وعقلى أبدا
عدت لنا سالما ولأولادك سعد وعمر وسلمة وفاطمة وأحمد
ومنة التى ولدت وأنت بالمعتقل











مفرقتش كتير


مفرقتش كتير بره عن جوه كل محصل بعضه

بل على العكس ممكن يكون جوه أحسن على الأقل إنت عارف إنك محبوس

والموضوع إنى كنت بزور أخ من بلدنا معتقل بسجن وادى النطرون

والغريب إنى ملاحظتش فرق إطلاقا بين جوه السجن وبراه

كلها حابسة ،كلنا مسجونين بس فى سجن أكبر من سجن وادى النطرون

سجن كبير إسمه مصر

وأنا داخل السجن حسيت بالظبط كأنى داخل الجامعة

نفس الأسوار العالية ونفس العساكر اللى لابسين بدل بيج وواقفين يشوفوا إثبات الشخصية بتاع كل واحد

نفس الوجوه الخائفة البائسة التى إعتادت على الذل

نفس الطابور أمام البوابة

دا حتى عندنا فى الفرع الخارجى مش كفاهم السور الحديد فعملوا سور من الطوب خلف السور الحديد

وكلها حبسة وكلها معتقلات

وكله بيودى على كله

الجامعة -المعتقل -مصر

سلام مربع لعم عبدووووووو


عم عبدالرؤف ده بقى اللى فى الصورة قدامكوا

أهم معلم من معالم كلية الحقوق

راجل فلاح عجوز

عاش طول عمره يخدم الداخلية بجد وإجتهادغير عادى

الراجل عم عبالرؤف ده

مبيقعدش فى حته طول النهار رايح جاى تحس كده إنه مدير الكلية

عم عبدالرؤف اصبح مثقف جدا من كتر ماقرا معارض لوحات ونشرات وبيانات ومجلات ومن كتر ماسمع كلمات مدرج ومن كتر ماحضر من اعتصامات وشاهد من مسيرات

عم عبدوو بيتعامل مع إصدرات طلاب الإخوان بدرجة غير عادية من الإهتمام

يعنى أول لما ننزل فى الكلية معرض لوحات تلاقى عم عبدوو جاى جرى ويطلع الورقة من جيبه ويبدأ يكتب وفى الأيام الأخيرة ونظرا لظروف كبره فى السن أصبح يستخدم نظارة قراءة ثقافة بقى وحرص على العلم

أه لو كل الطلبة يتعاملوا مع إصدارات طلاب الإخوان بنفس الدرجة من الإهتمام

عمر ماكان ده هيبقى حالنا

والحقيقة لو أنا وزير الداخلية كنت مسكت الراجل ده منصب كيير قوى فى الوزارة

كنت أخليه دراعى اليمين

ياراجل ياطيب ده مفيش قائد حرس جه الكلية يقدر يمشى من غيره ومن غير خبرته

عم عبدالرؤف الراجل الأقوى داخل كلية الحقوق

أخر سنة ليه فى الخدمة السنة الجاية

تعيش وتخدم ياعم عبدووووووووووووووووووووووووووو

وربنا يخليك لمصر إنت وكل اللى زيك

مصر أمانة فى إيديك إنت والرجالة

(إن فرعون وهامان وجنودهما كانوا خاطئين(

الخميس، 22 نوفمبر 2007

إياكى يوم


إياكى يوم تستغربى

لوقلت لك

إنتى وأنا

قلبين ساكنهم الألم

قلبين ساكنهم الوجع

بنمد بيه للجد لكن عندنا

فرعين بعاد

على سكتين

فإنتى الوجع عندك

بيزعق فى الملأ

أما الوجع عندى أنا

دوامة سحبانى لغرق

الأربعاء، 21 نوفمبر 2007

لسه بحلم


وبرغم إن فى حاجات كتير قوى حلمت إنى أحققهاومحققتش منها حاجة
برغم العتمة والضلمة
لسه بحلم
لسه بحلم ألاقى نفسى وأتملك زمام حياتى وأكون أنا أنافى زمن المعظم فيه من فاقدى أنفسهم
أناس تسيرهم الظروف كيفما يترأى لها
لسه بحلم إن الفجر يطلع بنوره يشق الظلام ويمحى العتمة
لسه بحلم بمصر بلدنا تانى ترجع زى زمان
حرة وأبية وخيرها لينا إحنا ولادها
بحلم لو الكلمة مش عليها ضريبة ونعيش أحرار زى ماربنا خلقنا
نختار كل حاجة فى حياتنا بحرية
من أول الرئيس لحد الغفير
ونقول من غير خوف كل اللى عايزينه
بحلم لو شرع ربنا يحكمنا
والمسلمين ليهم راية واحدة تجمعهم من تانى تحتها
بحلم لو مفيش ولا بلد إسلامى محتل
والأقصى متحرر
بحلم لو ألمح نظرة رضا فى عين النبى صلى الله عليه وأشرب من أيده عندالحوض
شربة لا أظمأ بعدها أبدا
بحلم لو أدخل الجنة
بحلم وأحلامى
شايفها حقيقة قدام عينى
بحلم ومفيش قوة هاتقدر تمنعنى إنى أحلم
دا لو بطلنا نحلم نموت
ولو عافرنا أكيد هانفوت
بس نحاول ونجرب
مرة وإتنين وتلاتة
مدمن الطرق على الأبوابتوشك أن تفتح له
وأخيرا لو محققتش أحلامى فأنا هاموت
وأنا بحلم إن يجى حد بعدى يكمل طريقى ويحقق كا اللى أنا مقدرتش أحققه

الثلاثاء، 20 نوفمبر 2007

قررت أدون

بعد مباحثات طويلة
مع نفسى قررت إنى
أعمل
مدونة أدون فيها عنى
واسجل فيها يومياتى

خصوصا إن أنا بالفرقة ا لرابعة
وجعبتى مليانة
محتاج أخرجها
أما ليه إسم المدونة لسة بحلم
فده تعرفوه من البوستات اللى